رصيدك في قلوب الناس.. بيزيد بأفعالك وبيخلص بتصرفاتك
بقلم: أبو يوسف محمد مجاهد
في العلاقات، في حاجة اسمها «الرصيد»..
كلمة بسيطة، لكن معناها كبير جدًا.
رصيدك عند الناس مش بيتبني بكتر الكلام الحلو، ولا بالوعود، لكن بيتبني بأفعالك وتصرفاتك، وبيزيد بالاهتمام والصدق والتقدير، وبيقل مع كل موقف يوجع أو يخيب الأمل.
لما تكرر نفس الأسلوب والطريقة رغم إنك عارف إنها بتوجع.. رصيدك بيقل.
لما تسيب حد زعلان منك، وكأنك بتربيه على البُعد والوجع.. رصيدك بيقل.
لما تتغير على حد من غير سبب واضح.. رصيدك بيقل.
لما حد يعاتبك على نفس الموقف مليون مرة، وأنت لا بتسمع ولا بتحاول تتغير.. رصيدك بيقل.
لما ميبقاش فيه تغيير حقيقي وملحوظ في تصرفاتك.. رصيدك بيقل.
لما تهوّن عليك مشاعر شخص مرة واتنين وعشرة.. رصيدك بيقل.
لما تتعامل حسب رغبتك ومزاجك، وكأن مشاعر الآخرين مش مهمة.. رصيدك بيقل.
لما الشخص اللي قدامك ميحسش إنه غالي عندك، وإن زعله بيفرق معاك.. رصيدك بيقل.
لما كلامك الحلو يبقى عكس أفعالك وتصرفاتك.. رصيدك بيقل.
ولما تكون الحقيقة واضحة قدامك، ومع ذلك تختار الكذب والتحوير.. رصيدك بيقل.
ولما تكون عارف الحقيقة كاملة، وتغمض عينيك وتسكت عن الحق.. يبقى رصيدك على وشك الانتهاء.
أما لما تكون عارف مين الظالم ومين المظلوم، ومع ذلك تختار إنك تسند الظالم وتدافع عنه.. فوقتها رصيدك يكون نفد.
فوقوا وراجعوا نفسكم..
لأن لكل شيء حساب، ولكل موقف ثمن، وكل إنسان مسؤول عن اختياراته وتصرفاته.
بلاش تزييف، وبلاش نفاق، وبلاش ظلم..
قولوا كلمة الحق حتى لو كانت صعبة، لأن اللي بتعمله في الناس هيرجع لك يومًا ما، بطريقة أو بأخرى.
وابنِ لنفسك رصيدًا كويسًا في تعاملاتك مع الناس..
خلي سيرتك طيبة، وكن شخصًا يُحترم ويُقدَّر، ويُذكر بالخير حتى في غيابه.
الموت قريب جدًا.. والحساب حق.
فاجعل لك رصيدًا طيبًا عند الناس، ورصيدًا أعظم عند الله.
