سهام ميلاد تكتب “عالم جديد”
العالم يعني أيه
العالم اللي أنت عايش فيه
يعني صناعة يعني تجارة
يعني تقدم و رقي يعنى حضارة
العالم يعني أنت
أنت اللي بتصنع العالم
العالم هو الناس هو أنت وأبنك
أزرع في أبنك كل معاني الإنسانية
أزرع فيه حب ورحمة عشان نمحي كلمة إرهاب
أزرع فيه خير ومودة عشان يبقي العالم أحباب
أزرع فيه الهدوء والأمان عشان يكون العالم في سلام.
أرسم معاه طريق المستقبل
و أمشيه معاه خطوة بخطوة
عشان توصل وياه لبكرة الأجمل
بكرة أجمل يا أبني بيك
خليك عارف إن العالم أمانة بين أديك
إمحي منه الإرهاب
إمحي منه الجهل والتعصب
إمحي منه كل فكر متطرف
إمحي منه كل فكر متخلف
أوعدني ياأبني وأحلف
إنك أمل بكرة
أه العالم ليك وبيك
العالم كله بين أيديك
أصنع بحبك فيه سلام
حقق بعلمك كل الأحلام
خلي العالم كله جمال
عالم جديد حقيقي
مش عالم خيال
أبني يا بني من تاني حضارة
حضارة بدأها أجدادك من زمان.
واوعي يابني تنسي إنك حفيد أقوي ملوك عظماء
بعلمهم صنعوا أكبر حضارة
حضارة أجدادك القدماء
حضارة حيرت العالم والعلماء
وانت كمان ياأبني قادر تبهر العالم وتغيره
وتعمل منه عالم جديد أه أنت وكل اللي زيك تقدروا
أوعى تخلى العالم على حاله
غيروا وأبنيه من جديد وعيشوا بجماله
خلوا العالم كله جمال
بالحب والخير والسلام مليان
ماتخلوش فيه حد فقير غلبان
عالم فيه الإنسان إنسان.