سهام ميلاد تكتب أنا مش للإمتلاك
أنا مش للامتلاك
أنا إنسانة حرة مش تحت أمر الملاك
أنا ممكن أكون كلى براءة وأبان ذى الملاك
لكن مجرد ماتهنى ولا تفكر تسجنى
مش هتلاقى منى غير بركان هلاك
أنا ممكن أكون رقيقة وطيبة وقلبى حنين
لكن ما بحبش أنكسر أنا دايما قوية وعقلى مش هين
أياك تستضعفنى ولا تستهون بيا
وتقول أنا الراجل وأنتى مجرد وليه
صدقنى أنا بميت راجل وأنت اللى صعبان عليا
مفكر نفسك شهريار زمانك وأنا مجرد جاريه
لأ فوق وأصحى لروحك وبطل أفكارك الرجعية
الست ذيها ذى الراجل وانتهى خلاص زمن العبودية
لو مفكر نفسك سى السيد زمانك
عمرى ماهكون ليك الست أمينة
أنا ست أه لكنى قوية ذكية مش مسكينة
أنا خلاص مابقتش وليه أنا حرة وليا رأيى ووصلت للنجومية
بقيت وزيرة ونجحت فى كل المناصب وأثبت نفسى
ويمكن فى يوم أوصل وأبقى رئيسة جمهورية
أنا المرأة أنا الأم أنا الزوجة أنا الأخت أنا البنت أنا الملاك
ماسمحش أكون سلعة تباع وتشترى
ماسمحش اكون مجرد جارية
ولا أسمح أكون للامتلاك.