سهام ميلاد تكتب” الأماكن”

سهام ميلاد تكتب” الأماكن”

أحيانا بتسافر لأماكن بعيدة جدا عنك
مش عشان تروح تشوف المكان لكن عشان تروح تشوف ناس عزيزة عليك وغالية عندك وبتحبها تقطع مسافات وطرق طويلة و بعيدة و ممكن تتعب عشان تشوف الناس اللى بتحبها وتسعد بوجودك معاهم ويهون عليك كل التعب لما تشوفهم.

وأحيانا تروح اماكن غريبة عنك وممكن تكون اماكن شعبية جدا وتدخل بيوت بسيطة جدا بتروح عشان تشوف وتقابل ناس بتحبها و بتكون مبسوط وسعيد معاهم ومش شايف إطلاقا إن المكان اللى انت قاعد فيه مكان بسيط جدا لكنك مبسوط وفرحان طب أيه سبب سعادتك وفرحك، سبب سعادتك وفرحك هما الناس اللى فى المكان مش المكان نفسه.

وأحيانا تروح لأماكن جميلة وتدخل بيوت فخمة لكن يتسلل لقلبك رهبة خوف عدم راحة وشعور بقلق وأحيانا ملل مكان جميل لكن بلا روح بلا فرحة بلا محبة وإحساس كأنك فى غربة وتبقى عايز تمشى وتبعد عن هذا المكان بسرعة طب ليه لأن الناس الموجودين فىهذا المكان انت مش فى بالهم مش ساكن قلبهم مش شاغل فكرهم هتلاقى المكان عندهم مهما بلغت فخامته لكنه بارد بلا روح كله ملل انت مش سعيد ولا فرحان معاهم.

يبقى الاماكن الحقيقية هى الناس والصحية الجميلة اللى بتلاقى نفسك فيهم ومعاهم الأماكن الجميلة هي القلوب اللى بتحبك وأرواح الناس الجميلة، بتعجبنى جدا جدا مقطع فى أغنية، أه يا أسمرانى اللون للفنانة شادية،  بتقول فيه وأنت قايلى إن غبت يغيب من الدنيا أحلى مكان
فعلا حقيقى قلوب الناس اللى بتحبك هى أحلى مكان فى الدنيا.