سهام ميلاد تكتب “الزواج إختيار”
على فكرة و خليكم عارفين إن الجواز إختيار وليس إجبار أو زى ما بيقولوا قسمة ونصيب لأ إطلاقا الزواج بيكون بإختيارك و بكامل إرادتك وبكامل قواك العقلية يعنى ماحدش خصبك أو تزوجت بالإكراه أكيد لأ يعنى لما نيجى نختار شريك حياتنا نحسن الإختيار وخصوصا إن الزواج المسيحى رباط أبدى فلابد من التدقيق و التأنى ولاداعى للتسرع لأى سببا كان خذ الوقت الكافى لدراسة أخلاق وصفات وطباع من ستشاركه حياتك.
وربنا أنعم عليك بالعقل لتختار شريك حياتك بعقلك قبل قلبك فكر كثيير فى كل صغيرة قبل الكبيرة وسأل نفسك هل أنت متقبل هذا الإنسان بعيوبه قبل مميزاته هل انت تقدر تعيش حياتك الطبيعية معاه بكل بساطة دون عقد.
هل هو نفسه إنسان طبيعى سوى مش معقد ولا بيعقد الأمور ولا بيعمل من الحبة قبة ولا بينقضك وينقض كل شئ يتعلق بيكى
خلينا متفقين إن مفيش إنسان ملاك
بلا عيوب لكن فيه عيوب تقدر تتقبلها وتتعايش معاها وفيه عيوب لا يمكن تقبلها وإستحالة العيش معها يبقى هنا لازم يكون فيه تفكير وتدقيق حتى لاتدمرى حياتك بأيدك وتبقى أختياراتك دمرت حياتك
لأ إحنا عايزين إختيارات تنور و تسعد وتلون حياتك بأزهى وأبهى الألوان متبقاش حياتك سودا و زفت وطين ومرار طافح ومشاكل مستمرة بلا نهاية طب من البداية نحسن الإختيار.
إزاى. أقولك ٱزاى
نختار الأصل والتربية
نختار الأخلاق وأبن المسيح
لأن من أحب المسيح أحبه المسيح و رفعه
نختار الكريم لأن الإنسان الكريم كريم أيضا فى مشاعره
نختار العاقل الهادئ
نختار حلو اللسان وليس سليط اللسان
نختار الانسان البسيط اللى كل أموره يمشيها ببساطة معندوش عقد
نختار الانسان اللى شايف شريك حياته أو شريكة حياته وبس ودون المقارنة بأى حد غيره
نختار القلوب البيضاء الطيبة المتسامحة مش الناس اللى تتلكك على الواحدة وتحاسبك على أقل غلطة
نختار اللى تحسه إنه منك أنه زيك أنه شبهك أنه ضلك
نختار اللى تحسى معاه بأمان براحة
مش إنسان موتر قلوق أو عصبى
نختار الناس اللى يحتوكى يحبوكى
مش ناس رفضينك تدخلى عيليتهم
اختارى اللى يقدرك ويحترمك مش إنسان يعيب فيكى ويصغرك ادام الناس
لأن الاحترام أهم بكثير من الحب
المهم إحسنوا الإختيار دققوا كثيرا لاتتسرعوا حكموا عقولكم قبل قلوبكم قبل أن تقعوا فى ندم
فى وقت لاينفع فيه ندم.
Comments are closed.