فـ المراية اظبُط هدومي
بقلم: اللواء ا.ح محمد مجاهد
عدى قطر العمر فيا
وسابني واقف بين همومي
كنت عيل لسه بحبي
الزمن سَلّم فرح بي
بالشبه بقرا الكتابة
و استهجى إسم صاحبي
كنت خايف م الغياب
كنت خايب فـ الحساب
كنت بحسب ع الصوابع
كام صديق فـ السكة ساب
السنين شقت قميصي
كان جديد لانج انجليزي
عرت السنوات جسدها
خام أنا ملفوف فـ كيسي
اتشاقيت شق وشقاوة
الشنب زاد الحلاوة
أي سنيورة تشابكني
اخطف البوستين إتاوة
ابتديت شعر وكتابة
برسم الناس الغلابة
كل لحظة وكل ذكرى
حتى لحظات الكآبة
كنت قلقان أبقى عالة
بشرب الشاي للثمالة
بَلّت الأحزان قميصي
إمتى هنشف من دي حالة ؟!
زاد حنيني و زاد حناني
غصب عني نسيت جناني
لما سنة لولي وقعت
جرت الباقي فـ سناني
شعرة بيضة فـ غيط دماغي
تسأل الشعرات تلاغي
هو أنا عجزت إمتى ؟
فين أقدم طاب بلاغي ؟
خدروني ببنج كلي
فاضل إيه من عمري قولي ؟
هي دي الغدوة الآخيرة ؟
ولا مكتوبلي إني أحلي ؟
الشريط داير قصادي
حلو عدى ومُر عادي
كنت ناوي أرجع صغير
بعد ما تعدي السنادي
فـ المراية شوفت شايب
عضمه محني وجلده دايب
هو دا الواد اللي كان
يرمي شبكة يجيب حبايب
جسمي عجز قل نومي
القميص مجاش مقاسي
والسنين قطعت هدومي
هي دي الرحلة ببساطة
كان في بكرة جي أجمل
كان فـ نِفسي حاجات كتيرة
بس مش مكتوبلي تكمل.
